वृत्ताकार अर्थतन्त्र, जलवायु परिवर्तन तथा दिगोपन सम्बन्धी विशेष संवेदनशीलता तालिम सुरु
चितवन, सौराहा । तस्विर : कोमल चन्द्र भगत ।
चितवनको पर्यटकीय सहर सौराहामा वृत्ताकार अर्थतन्त्र, जलवायु परिवर्तन तथा दिगोपन सम्बन्धी विषयमा बागमती प्रदेशमा रहेर पत्रकारिता गरिरहेका पत्रकारहरूलाई लक्षित गरी विशेष संवेदनशीलता तालिम सुरु गरिएको छ। वन्यजन्तु संरक्षण संघ नेपाल (Wildlife Conservation Association Nepal) को आयोजनामा भएको उक्त तालिममा वागमती प्रदेशका विभिन्न जिल्लाबाट आएका २२ जना पत्रकारहरू सहभागी छन्।दुई दिने तालिमको उद्देश्य पत्रकारहरूलाई वातावरणीय विषयवस्तुमा अझ सचेत, जानकारीमूलक र संवेदनशील रिपोर्टिङ गर्न प्रेरित गर्नु रहेको छ।
तालिममा वृत्ताकार अर्थतन्त्र — जसले स्रोतको पुनस् प्रयोग, फोहोर न्यूनिकरण र पुनर्चक्रणलाई प्राथमिकता दिन्छ — को सन्दर्भमा नेपालमा लागू गर्न सकिने उपायहरू, जलवायु परिवर्तनको प्रभाव र यसको सन्दर्भमा सञ्चारको भूमिका, साथै दिगो विकास लक्ष्यहरू (SDGs) सँग सम्बन्धित विषयहरू समेटिएका छन्।कार्यक्रम उद्घाटन गर्दै वन्यजन्तु संरक्षण संघ नेपालका कार्यकारी निर्देशक सञ्जीवनी योञ्ञजन श्रेष्ठ ले जलवायु परिवर्तनको बढ्दो प्रभावको सन्दर्भमा सञ्चारकर्मीहरूको भूमिका झनै महत्वपूर्ण हुँदै गएको बताए। “वातावरणीय चुनौतीहरूको समाधानका लागि सूचनाको सही प्रवाह र जनचेतना अभिवृद्धि अनिवार्य छ, र यसका लागि पत्रकारहरू अग्रपंक्तिमा रहनुपर्छ,” उनले भने।
तालिममा वातावरण विज्ञ, पत्रकारिता प्रशिक्षक, तथा नीति निर्माता समेतले विभिन्न सत्र लिइरहेका छन्। सहभागीहरूले क्षेत्रीय उदाहरण, केस स्टडी, तथा व्यावहारिक अभ्यासहरूमार्फत विषयबस्तु बुझ्ने अवसर पाएका छन्। वागमती प्रदेशका पत्रकारहरूले तालिमबाट प्राप्त ज्ञान भविष्यमा नीतिनिर्माणमा प्रभाव पार्ने खालका तथ्यमा आधारित रिपोर्टिङ गर्न सहयोग पुग्ने विश्वास व्यक्त गरेका छन्। तालिम भोलि सनिवार सम्म सञ्चालन हुनेछ।
